Աշակերտության հիմքերը․ ձևաչափեր և օրինակներ

Ամփոփում․ Եթե մեր կիրառած ձևաչափը տեղ է տալիս բաց ու անկեղծ կիսվելու, աղոթելու և Սուրբ Հոգու առաջնորդությանը հետևելու համար, փոքր խմբի մասնակիցները քաջալերված կհեռանան, կառողջանան և փոքր խմբով Աստվածաշնչի ուսումնասիրությունը կպահեն իրենց հոգևոր աճի հիմքում։

Երբ փոքր խումբը հանդիպում է, ի՞նչ պետք է անի։ Ի՞նչ ենք միասին անում։ Պե՞տք է հետևենք որոշակի ձևաչափի, թե՞ ավելի լավ է ամեն ինչ թողնել «բնական ընթացքին»՝ տեսնելով, թե այդ շաբաթ փոքր խմբին ինչ է պետք։ Իսկ մի՞թե ժամանակ առ ժամանակ ամեն ինչ փոխելով չպետք է հանդիպումները հետաքրքիր պահենք։

Հաճախ անհանգստանում ենք, որ ձևաչափի հետևելու դեպքում փոքր խմբում չենք բավարարի մարդկանց կարիքները։

Մենք նաև ուժասպառ ենք լինում՝ մարդկանց հետաքրքրությունը պահելու համար նոր բաներ մտածելով։ Բայց փոքր խմբում մարդկանց հետաքրքրությունը պահում են իսկական սերը, իսկական շփումը և իրական Աստվածը։ Եթե մեր ձևաչափը տեղ է տալիս բաց ու անկեղծ կիսվելու, աղոթելու և Սուրբ Հոգու առաջնորդությանը հետևելու համար, փոքր խմբի մասնակիցները քաջալերված կհեռանան, կառողջանան և փոքր խմբով Աստվածաշնչի ուսումնասիրությունը կպահեն իրենց հոգևոր աճի հիմքում։ (Եվ հաճելի չէ՞ր լինի պատրաստվելու ժամանակն անցկացնել աղոթքով, ոչ թե Աստվածաշնչի ուսումնասիրության նոր նյութեր, սառույցը կոտրող վարժություններ, հարցեր կամ մարդկանց մտերմացնող զբաղմունքներ մտածելով։)

Փոքր խմբի ձևաչափը պարտադիր չէ, որ բարդ լինի․ այն կարող է պարզ լինել։ Պարզ ձևաչափը կդառնա հեշտ հիշվող ու կրկնվող ընթացք։ Հնարավոր է՝ ձեր փոքր խմբից շատերը հնարավորություն ունենան նոր փոքր խումբ սկսելու։ Եթե այդպես լինի, նրանք ավելի վստահ կլինեն, երբ հետևելու ձև ունենան, և ավելի պատրաստակամորեն ժամանակ կտրամադրեն, եթե ամեն շաբաթ նոր գաղափարներ մտածելու ճնշում չզգան։

Մեր հաջորդ ԴՆԹ բլոգում կխոսենք փոքր խմբի ընթացքի մեկ օրինակի մասին։ Այն կոչվում է «Երեք երրորդների» մոդել։