Փոքր խմբի գործիքների տուփ․ վարժվել Սուրբ Հոգով մկրտությանը

Ամփոփում․ Փոքր խմբում հնարավոր է միասին լինել մի վայրում, աղոթքով միավորվել և մկրտվել Սուրբ Հոգով։

«Գործիքների տուփ» շարքի գրառումներում կպատասխանենք փոքր խմբեր վարելու մասին ամենատարածված հարցերից մի քանիսին։ Եթե ունեք հարցեր, որոնց կուզենայիք պատասխան ստանալ, պարզապես գրեք մեզ։

Ինչպե՞ս է Սուրբ Հոգով մկրտությունը դրսևորվում իմ փոքր խմբում։

Եթե կա մի բան, որը սովոր ենք տեսնել մեծ հավաքույթների ժամանակ, դա Սուրբ Հոգով մկրտությունն է։ Երաժշտության հզոր հնչյունները, խմբով միասին Աստծուն հանձնվելը, կենտրոնացումն ու միասնությունը՝ այս պահերը ոգեշնչող են ու հուզիչ։

Բայց Սուրբ Հոգին նույն Աստվածն է՝ անկախ նրանից՝ ծառայում է մեծ բազմության, թե երեք հոգուց բաղկացած մտերմիկ խմբի։ Նրա մկրտությունը նույնն է։ Նրա զորությունը, որը մեզ հնարավորություն է տալիս ավետարանի մասին վկայելու, նույնն է։ Սա շատ քաջալերական է։

Երբ Հիսուսի առաջին հետևորդները մկրտվեցին Սուրբ Հոգով, նրանք բոլորը միասին մեկ վայրում էին և շարունակ աղոթքով միաբան էին (Գործք Առաքելոց 1։14, 2։1)։ Մի վայրում միասին լինելը, աղոթքով միավորվելը և Սուրբ Հոգով մկրտվելը հնարավոր է նաև փոքր խմբում։

Ուրեմն ինչպե՞ս անենք սա։

Բոլորի մասնակցությունն օգնում է միասնություն ստեղծել։ Յուրաքանչյուր մարդ պետք է աղոթքով փնտրի Սուրբ Հոգով մկրտվելը։ Թեև մարդիկ կարող են միայնակ՝ իրենց տներում աղոթել, առաջին եկեղեցին այդպես չէր վարվում։ Նրանք միասին էին։

Առաջին եկեղեցու որոշ անդամներ Սուրբ Հոգով մկրտվեցին, երբ մարդիկ ձեռքերը դրեցին նրանց վրա և աղոթեցին։ Եթե ձեր փոքր խմբի անդամներից մեկն արդեն մկրտվել է Սուրբ Հոգով, նա կարող է ձեռքը դնել մեկի ուսին և խնդրել Աստծուն, որ նրան էլ լցնի Սուրբ Հոգով։

Եթե փոքր խմբում ոչ ոք դեռ մկրտված չէ Սուրբ Հոգով, կարող եք մեկ այլ խմբից որևէ մեկին հրավիրել, որ գա, ձեռքերը դնի ձեր վրա և աղոթի, որպեսզի ընդունեք Սուրբ Հոգին։ Ահա մի օրինակ առաջին եկեղեցուց․

«Երբ Երուսաղեմի առաքյալներն իմացան, որ Սամարիայի ժողովուրդն ընդունել է Աստծո խոսքը, Պետրոսին ու Հովհաննեսին ուղարկեցին այնտեղ։ Հենց որ նրանք հասան, աղոթեցին, որ նոր հավատացյալներն ընդունեն Սուրբ Հոգին։ Նրանցից ոչ մեկի վրա դեռ Սուրբ Հոգին չէր իջել, որովհետև նրանք միայն Տեր Հիսուսի անունով էին մկրտվել։ Այն ժամանակ Պետրոսն ու Հովհաննեսը ձեռքերը դրեցին հավատացյալների վրա, և նրանք ընդունեցին Սուրբ Հոգին»։

Գործք 8:14-17

Պետք է նշել, որ վաղ եկեղեցում եղել են դեպքեր, երբ մարդիկ մկրտվել են Սուրբ Հոգով առանց որևէ մեկի՝ նրանց վրա ձեռք դնելու (Գործք 2:4, 10:44)։ Սա նշանակում է, որ այս փորձառության համար որոշակի բանաձև չկա։

Եթե հանդիպում եք սրճարանում կամ մեկ այլ հանրային վայրում, գուցե մի որոշ ժամանակ օգտակար լինի հանդիպել տանը։ Տանը ավելի շատ գաղտնիություն կլինի, և ոչինչ չի շեղի ձեր ուշադրությունը։ Բայց որտեղ էլ հանդիպենք, փոքր խմբով կարող ենք միասին լինել մի վայրում, միասնական աղոթել և մկրտվել Սուրբ Հոգով։