Jinsi ya Kufanya Mazoezi ya Kushiriki kwa Njia Rahisi

Kujizoeza kusimulia kuhusu Yesu kunaweza kukufanya usijisikie vizuri mwanzoni. Hilo ni sawa! Lakini, mnapokuwa katika kikundi kidogo salama, kila mtu anaweza kujifunza, kukua na kujizoeza pamoja. Hilo litawasaidia kujiamini. Roho Mtakatifu yuko pamoja nasi hata tunapojizoeza.

Hapa chini kuna njia rahisi ya kujizoeza kusimulia hadithi yako. Unaweza kufanya hivi peke yako, lakini ni vizuri kujizoeza pamoja na rafiki au katika kikundi kidogo.

Kusimulia Hadithi Yako

Jizoeze kusimulia kwa dakika moja jinsi ulivyompata Yesu.

1. Jinsi alivyokupata…

2. Jinsi ulivyomchagua na kuahidi kuwa mwanafunzi wake…

3. Jinsi alivyokubadilisha na anavyoendelea kukubadilisha…

4. Malizia kwa swali hili: “Asante kwa kunisikiliza. Una maoni gani kuhusu nilichokusimulia?”

Kusimulia Hadithi ya Yesu

Fikiria rafiki anayemhitaji Yesu na jambo linalomsumbua. Mwombe mwenzako wa mazoezi afikirie na kuigiza hali kama hiyo. Si lazima awe mwigizaji mtaalamu.

1. Anza kwa kusema kitu kama, “John/Sue, najua umekuwa ukiumia.”

2. Mara nyingi Roho Mtakatifu hukukumbusha hadithi ya injili inayohusiana na hali yao. Unaweza kusema, “Kwa sasa nimekumbuka hadithi ya wakati Yesu alipokuwa duniani.” Simulia hadithi hiyo kwa maneno yako mwenyewe.

3. Malizia kwa kusema, “Asante kwa kunisikiliza. Hadithi hiyo inakugusa vipi?”

Kusimulia Kupitia Maombi

1. Mara nyingi, tunapozungumza na marafiki, familia au watu tusiofahamu, mtu husimulia jambo linalomvunja moyo au kumchosha. Mgeukie mtu katika kikundi chenu na umwombe asimulie jambo lililomchosha au kumvunja moyo wiki hii.

2. Baada ya kusimulia, rudia kwa maneno yako ulichosikia. Kwa mfano, “Naelewa kwamba habari za mwanao kuumia zilikutia wasiwasi kama mzazi anayempenda.”

3. Endelea kwa kusema kitu kama, “Ningependa kuomba pamoja nawe. Ninaamini Mungu anataka kuja na kukusaidia katika jambo hili linalouumiza moyo wako na mwili wa mwanao.”

4. Mwombe Bwana afanye lolote linalohitajika (kwa mfano, kuponya, kutia moyo, kutoa hekima au mahitaji).

5. Wakati fulani wanaposimulia (au mnapoomba), Roho Mtakatifu anaweza kukukumbusha Maandiko, picha au maneno ya kutia moyo. Tafadhali mshirikishe mtu huyo ujumbe huu wa kutia moyo. Unaweza kusema hivi, “Nilipokuwa nikisikiliza na kuomba, jambo fulani lilinijia moyoni…”