Փոքր խմբի գործիքների տուփ․ լսել Սուրբ Հոգուն

Ամփոփում․ Երեսուն վայրկյան կամ մեկ րոպե լռությունը ցույց է տալիս, որ կարևորում ենք այն, ինչ Սուրբ Հոգին ուզում է մեզ ասել։

«Գործիքների տուփ» շարքի գրառումներում կպատասխանենք փոքր խմբեր վարելու մասին ամենատարածված հարցերից մի քանիսին։ Եթե ունեք հարցեր, որոնց կուզենայիք պատասխան ստանալ, գրեք մեզ։

Ինչպե՞ս օգնեմ իմ փոքր խմբին լսել Սուրբ Հոգուն։

Մեր հանդիպումների սկզբում կարող ենք պատմել այդ շաբաթ Սուրբ Հոգուն լսելու մի պարզ պատմություն։ Առօրյա, սովորական կյանքի փորձառությունները գուցե արժանի չթվան պատմելու։ Բայց այդ ամենօրյա պահերը մեր մեջ Սուրբ Հոգով առաջնորդվելու ցանկություն են արթնացնում, քանի որ Սուրբ Հոգուն դարձնում են մեզ մոտ, ոչ թե հեռու։

Մեր հանդիպումների արձագանքի ժամանակ կարող ենք լռության տեղ թողնել։ Երեսուն վայրկյան կամ մեկ րոպե լռությունը ցույց է տալիս, որ կարևորում ենք այն, ինչ Սուրբ Հոգին ուզում է մեզ ասել։ Լռությունից հետո պետք է պատրաստ լինենք պարզ ու կարճ նախադասություններով կիսվելու, թե ինչում է Սուրբ Հոգին հանդիմանել մեզ։ Մենք օրինակ ենք ծառայում՝ ցույց տալով, թե ինչպես ապրել՝ լսելով Սուրբ Հոգուն։

Ի՞նչ անեմ իմ փոքր խմբի չափազանց հոգևոր մարդկանց հետ։

Ոմանք կարող են վախեցնել փոքր խմբի մյուս անդամներին՝ չափազանց կարևորելով Սուրբ Հոգու հետ ունեցած իրենց փորձառությունները։ Երբ նրանք կիսվում են, կարող ենք ուրախանալ, որ նրանք լսել են Սուրբ Հոգուն և արձագանքել Նրան՝ փորձառությունն ինքնին տոնելու փոխարեն։ Կարող ենք հարցնել․ «Ինչպե՞ս արձագանքեցիր Սուրբ Հոգուն, երբ Նա դա հայտնեց քեզ»։ Այսպես կարևորում ենք նրանց մասնակցությունը խմբին՝ միաժամանակ օգնելով նրանց ավելի խորությամբ հասկանալ մեր արժեքները։